Në 20 raste ndaj partive politike që kanë shkelur masat anti-COVID, Komuna e Prishtinës ka shqiptuar gjobë prej 2000 eurosh, ka njoftuar drejtori i Inspektoratit në këtë komunë, Adonis Tahiri.

Në ditën e fundit të fushatës zgjedhore, Tahiri ka njoftuar se janë shqiptuar pesë gjoba.

Nga lista që ai ka publikuar, Vetëvendosje prin me 7 gjoba. Ajo ndiqet nga Lidhja Demokratike e Kosovës me pesë gjoba, ndërsa Partia Demokratike dhe Aleanca për Ardhmërinë kishin nga tri. Nisma dhe AKR-ja kishin nga një gjobë.

Tahiri ka shtuar se nëse gjobat nuk paguhen brenda afateve të legjislacionit për kundërvajtje, shkojnë në procedurë të përmbarimit.

Të gjitha partitë kanë shkelur masat në tubimet me qindra qytetarë, edhe pse me masat anti-COVID numri ishte i limituar. Në shumicën e tyre nuk është respektuar masa e distancës e as ajo e bartjes së maskës.

Këto tubime kanë alarmuar profesionistët shëndetësorë që i druhen një rritje të rasteve të reja me koronavirus.

Deri tash në Kosovë janë regjistruar 63 mijë e 805 raste pozitive ndërsa 1540 persona kanë vdekur. Janë edhe 7041 raste aktive.