Arbëri

Asnjë zyrtar nuk është dënuar për pirje duhani në institucione, Zemaj paralajmëron këshill për kontroll

Asnjë kërkesë për inspektim të hapësirave lidhur me pirjen e duhanit nuk është dorëzuar në Inspektoratin e Punës.

Ushtruesi i detyrës së kryeinspektorit të këtij inspektorati, Agim Millaku, ka thënë se deri më tani asnjë person zyrtar nuk është gjobitur për konsum të duhanit brenda hapësirave të punës, raporton KOHA.

Për shkeljen e Ligjit për kontrollin e duhanit nga ata që e miratuan, javë më parë, kryetarja e Kuvendit, Vjosa Osmani, ka drejtuar një kërkesë në Ministrinë e Shëndetësisë.

Kërkesës së saj, këtë të premte, i është përgjigjur i pari i kësaj Ministrie, Armend Zemaj.

Në letrën që ka siguruar KOHA, Zemaj ka paralajmëruar formimin e një këshilli ndërministror për kontroll të duhanit.

Më 5 qershor, kryeparlamentarja Osmani, pasi kishte vërejtur disa deputetë duke pirë duhan brenda hapësirave të Kuvendit, kishte kërkuar angazhimin e Inspektoratit për mbikëqyrjen e Ligjit të duhanit.

Sipas nenit 12 të Ligjit për kontrollin e duhanit, paragrafi 1.5, thuhet se Organi i Punësimit i zbret nga paga neto mujore prej 50 euro personit fizik që pi duhan në vendin e punës, në bazë të raportimit paraprak të personit gjegjës.