Arbëri

Përse Abdixhiku zgjodhi LDK-në e jo Vetëvendosjen

Anëtari më i ri i LDK-së, Lumir Abdixhiku, ka treguar arsyet përse zgjodhi pikërisht këtë parti për të hyrë në politikë.

Ai ka thënë se zgjedhjet e parakohshme ndikuan që të veprojë më shpejt sa i përket hyrjes në politikë. Në Interaktiv të KTV-së ka treguar se LDK ia hapi dyert dhe se programi i kësaj partie ishte më i përafërt me qëndrimet e tij në shumë drejtime.

“Ishin disa momente. E para ishte vendimi i LDK-së për të hapur dyer për njerëz të rinj. Kjo hapje e derës pasoi pas vendimit të kryeministrit Isa Mustafa për të mos kandiduar më për kryeministër. E dyta ndoshta është ndjekja e një rruge të ndryshme prej asaj të deritanishmes. Është zgjedhje e karrierës. Po futem për të qenë anëtar i thjeshtë që të kontribuoj më ndryshe në afate më të gjata”, ka thënë ai.

Sa i përket arsyeve përse nuk hyri në Vetëvendosje, por në LDK Abdixhiku ka thënë se nuk ka mundur të tradhtojë bindjet e tij të djathta dhe të futet në parti të krahut të majtë.

“Për shkak të çështjeve ideologjike nuk përputhem me partitë e krahut të majtë”, ka shtuar ai.