Shumë pensionistë kanë pritur me orë të tëra në Hotel Grand, që të aplikojnë në një thirrje, për t’i marrë pensionet e tyre nga koha e paraluftës.
Por, gjithçka po del të jetë mashtrim nga dy persona, të cilët janë intervistuar nga Policia, raporton KTV.
Sipas njoftimit të Policisë, ndaj H. K., 66-vjeçar dhe I. SH., po ashtu i moshës së njëjtë, është iniciuar rast për mashtrim në bashkëkryerje dhe, me vendim të prokurorit, ata do të mbrohen në liri.
Njoftimi i tyre i bërë publik në rrjetet sociale, ftonte pensionistët e Kosovës që të aplikojnë për t’i marrë pensionet e Serbisë, sipas një vendimi të Gjykatës së Strasburgut.
Hysnije Abdullahu, pensioniste që jeton në Londër, tregon se me ta parë lajmërimin, ka dyshuar se bëhet fjalë për mashtrim dhe e ka lajmëruar Policinë.
Thotë se iu dhimbsën pensionistët e tjerë që ranë pre e këtij mashtrimi.
Pensionistë të tjerë janë shprehur të zhgënjyer me këtë njoftim, me të cilin thonë se u bë shaka me ta.
Federata Sindikale e Pensionistëve të Kosovës u ka bërë apel të gjithëve që të kenë kujdes e të mos bien pre e mashtrimeve.
Në një përgjigje të shkruar, Ministria e Punës dhe Mirëqenies Sociale, ka thënë se Departamenti i Pensioneve nuk ka asnjë informatë se mund të jepen pensione në këtë formë.
-
Nga: Dritë Slivova Polisi
-
24 korrik 2019 22:19
-
Shpërndaje në: