Arbëri

Verifikimi i vështirë i pasurisë së paligjshme të zyrtarëve shtetërorë

Foto: Koha

Që nga themelimi i Agjencisë Kundër Korrupsionit, zyrtarët shtetërorë në Kosovë janë të obliguar që të deklarojnë pasurinë e tyre.

Mirëpo, procesi i deklarimit të pasurisë është kritikuar vazhdimisht nga shoqëria civile, për shkak se është thënë se zyrtarët pavarësisht se janë të obliguar të deklarojnë pasurinë, procesi nuk shërben në mënyrë efektive në luftimin e pasurisë së paligjshme.

Drejtoresha e organizatës “FOL”, Mexhide Demolli-Nimani, thotë se deklarimi i pasurisë është përcjellë me probleme të vazhdueshme.

Sipas saj, zyrtarët nuk e deklarojnë pasurinë e plotë, si dhe nuk e marrin seriozisht procesin e deklarimit të pasurisë.

“Duke parë këto mangësitë, shumë zyrtarë nuk janë marrë seriozisht me deklarim të pasurisë saqë në formularët e dorëzuar në Agjencinë Kundër Korrupsion, kanë ndryshuar vetëm datën e dorëzimit. Për shembull, një zyrtar e deklaron një veturë të njëjtë me çmimin e njëjtë gjatë 5-6 viteve. Kjo s’ka logjikë kur e dimë një veturë për këto vite amortizohet dhe nuk mund të ketë çmimin e njëjtë qoftë dhe mbas një viti”, thotë Mexhide Demolli-Nimani.

Radio Evropa e Lirë