Arbëri

Përleshje e armatosur mes disa personave në “Dardani” – njëri përfundon në QKUK

Sot rreth orës 11:30, Policia ka marrë informacionin se në lagjen “Dardania” në Prishtinë, saktësisht në rrugën “Lekë Dukagjini”, ka ndodhur një përleshje fizike mes disa personave, ku është përdorur një armë zjarri dhe një armë e ftohtë (thikë).

Menjëherë pas marrjes së këtij informacioni në vendin e ngjarjes kanë dalë të gjitha njësitet e nevojshme policore, të mbështetura edhe nga hetuesit e stacionit policor të jugut si dhe njësitë e tjera për ekzaminim të vendngjarjes.

“Si pasojë e përleshjes një person, F. B, mashkull, 19 vjeç, shtetas i Kosovës, ka marrë plagë nga arma e ftohët (thikë) dhe i njëjti menjëherë është dërguar në QKUK për trajtim mjekësor”, bën me dije Policia e Kosovës.

“Gjithashtu janë shkaktuar edhe dëme materiale, ku nga predhat e armës, janë dëmtuar dy automjete që kanë qenë të parkuara në afërsi të vendit ku ka ndodhë incidenti”, thekson më tej PK.

Në kuadër të veprimeve të saj, policia me një intensitet të shtuar ka ndërmarrë një varg veprimesh operative e hetimore, me fokus zbulimin e identitetit dhe vendndodhjen e të dyshuarve të mundshëm si dhe ka zgjeruar rrethin e hetimit në përpjekje për të ndriçuar dhe sqaruar të gjitha rrethanat që kanë të bëjnë me rastin.

Si rezultat i kësaj, rreth orës 12:00, policia ka arritur të identifikoj dhe të shoqëroj në stacion policor dy persona të dyshuar.

Lidhur me gjithë këtë ngjarje, me urdhër të Prokurorit të shtetit, janë hapur rastet, "vrasje e rëndë në tentativë" dhe "armëmbajtje pa leje".