Arbëri

Vetëvendosja shpalos dështimet e institucioneve të sigurisë

Lëvizja Vetëvendosje përmes një konference për media i ka shpalosur ato që i quan dështime të institucioneve të sigurisë në Kosovës.

Deputeti Rexhep Selimi tha se institucionet kanë kaluar në situata të vështira dhe në më shumë se çdo mandat tjetër qeverisës në këtë mandat kanë ndodhur shumë skandale.

Ai e ka cilësuar si ngjarjen më të rëndësishme atë të dëbimit të gjashtë shtetasve turq, i cili sipas tij ka ndodhur në mënyrë jo të ligjshme. Selimi tha se punën e Ministrisë së Brendshme e ka vështirësuar edhe ndërrimi i shpeshtë i ministrave.

Kurse, duke folur për Agjencinë Kosovare të Inteligjencës Selimi tha se në këtë vit kanë ndodhur zhvillime që e kanë dëmtuar këtë institucion.

“Në AKI kanë ndodhur zhvillime që e kanë dëmtuar këtë institucione në krye të këtij institucioni ka ardhur një person i cili duhej të shkarkohej, derisa brenda këtij institucioni të lartë të sigurisë ka ndodhur edhe një vrasje", ka shtuar Selimi, përcjell KosovaPress.

Sipas tij, Policia ka dështuar të ofrojë siguri për mbrojtjen e viktimave të dhunës, si dhe ka dështuar në sigurinë në trafik.

Selimi po ashtu shpreh se qeveria ka dështuar ti ofroj dy ligje të rëndësishme atë të pensionimit të mëhershëm të policëve dhe ligjin për shpëtim dhe zjarrfikëse

Përveç çështjeve të lartcekura për sigurinë në vend, Selimi ka përsëritur se kjo parti nuk ka ndryshuar qëndrim sa i përket dialogut me shtetin serb.