Arbëri

Kocijançiç për protestën e PD-së: Debati politik të zhvillohet në parlament, jo jashtë tij

Maja Kocijançiç, zëdhënëse e KE, i është përgjigjur interesit të RTSH-së, lidhur me protestën e opozitës në Shqipëri.

RTSH: Cili është qëndrimi i Komisionit Evropian lidhur me kërkesat e opozitës? Siç e dini ka një grevë, u organizua një protestë kombëtare dhe kryetari i PD-së, Basha, thotë se gëzon mbështetjen e ndërkombëtarëve në kërkesat për largimin e kryeministrit Rama dhe krijimin e një qeverie teknike deri në zgjedhje, përfshirë dhe çështjen e votës elektronike, në të kundërt deputetët e pakicës bojkotojnë Kuvendin, për pjesën e mbetur të punimeve.

Kocijançiç: Për ne, debati politik duhet të zhvillohet brenda parlamentit dhe jo jashtë tij. Polarizimi i mëtejshëm i arenës politike do të ishte vetëm kundër-produktive për ambicien e Shqipërisë për t’iu bashkuar Unionit Evropian, madje edhe për avancimin në rrugën e saj evropiane.

Për këtë arsye, është e rëndësishme të tregohet vazhdimësia e parlamentit në një moment kyç, kur diskutohen e miratohen ndryshimet, në veçanti ato që lidhen me reformën e drejtësisë.

Këto ndryshime kanë rëndësi thelbësore për të siguruar progresin e mëtejshëm të Shqipërisë në rrugën drejt BE-së dhe siç e mbani mend, Komisioni rekomandoi në nëntor nisjen e bisedimeve të anëtarësimit, subjekt i zbatimit të prekshëm e të besueshëm në reforma specifike dhe pikërisht reforma e drejtësisë është ajo që kam në ndërmend.

RTSH: Nisur nga përgjigja teknike e menjëhershme e kabinetit të Komisionerit Hahn ndaj letrave të dy ministrave të LSI-së mbi Bordin e Menaxhimit të Operacionit Ndërkombëtar të Monitorimit, siç është publikuar në Tiranë, si ndikojnë këto qëndrime në marrëdhëniet me vendin? A parashikohet vizitë në Tiranë? Kur do mbahet tryeza e radhës e dialogut të nivelit të lartë?

Kocijançiç: Komisioneri Hahn ka marrë disa letra në të vërtetë dhe u është përgjigjur atyre. Siç e dini, ngritja e bordit për Operacionin Ndërkombëtar të Monitorimit është diçka e diskutuar thellësisht në detaje me qeverinë shqiptare.

Është dhënë shumë informacion mbi këtë dhe është ngritur në përputhje me legjislacionin përkatës dhe Kushtetutën e Shqipërisë dhe detyra e bordit është për të monitoruar procesin.

Pra, është tejet e qartë dhe transparente.

Reforma në vetvete është sfiduese dhe për këtë arsye, Bashkimi Evropian vazhdon mbështetjen e tij për punën sa i takon reformës në drejtësi.

Për momentin, mund të them se me Tiranën vazhdojnë kontaktet e rregullta me shumë intensitet.