Miratohet Rezoluta për normalizimin e marrëdhënieve me Serbinë

Publikuar: 18.10.2012 - 15:07

Prishtinë, 18 tetor – (E plotësuar) Deputetët e Kuvendit të Kosovës miratuan pak çaste më parë me shumicë votash Rezolutën për normalizimin e marrëdhënieve me Serbinë. Për të votuan 68 deputetë, nga 75 sa ishin të pranishëm, ndërkaq ishin kundër vetëm tre deputetë dhe katër abstenuan.

Debati për këtë dokument u përshkua nga polemika të ashpra ndërmjet deputetëve, në veçanti të atyre të Vetëvendosjes. Ndonëse edhe deputetë të LDK-së shfaqën rezerva ndaj nevojës për miratimin e një rezolute të tillë, votimi dëshmoi se ajo u votua edhe prej tyre. Madje, deputeti Sabri Hamiti e vuri në pikëpyetje qoftë edhe pajtimin e subjektit të tij që të jetë pjesë e grupeve sponsoruese (kryetari që ndodhet në Bukuresht me asnjë fjalë nuk na ka njoftuar se është pajtuar – e kishte fjalën për Isa Mustafën, sqarim ynë).

Ndërkaq deputetët e Vetëvendosjes ishin kundërshtar të vendosur të këtij dokumenti. Kur ajo u votua, dolën para foltore së Kuvendit me një transparent në të cilin shkruante “Rezolutë e nënshtrimit ndaj Serbisë”.
Ndërkohë deputetët do të jenë në një pushim, për të vazhduar pasdite procedimin e pikëve të tjera të parapara me rendin e ditës.

---

Pas ndërprerjes njëorëshe, rifillon mbledhja e Kuvendit

Prishtinë, 18 tetor - 11:26 - (E plotësuar) Ndërkohë, pas një orë ndërprerjeje të punës për shkak të rrethimit nga policia, ka vazhduar punën Kuvendi i Kosovës sipas rendit të ditës të përcaktuar nga Kryesia e tij.

Në mbledhjen e sotme të Kuvendit të Kosovës, pas pikave të zakonshme: koha për deklarime jashtë rendit të ditës dhe koha për pyetje parlamentare, në rendin e ditës do të jetë shqyrtimi i Propozim Rezolutës për normalizimin e marrëdhënieve në mes Republikës së Kosovës dhe Republikës së Serbisë. Kjo rezolutë është propozuar nga 5 grupe parlamentare, përkatësisht PDK, AAK, KKR, SLS dhe Grupi 6 +.

Në vijim do të shqyrtohen Projektligji për ratifikimin e amendamentit të neneve të Marrëveshjes së Fondit Monetar Ndërkombëtar për reformën e Bordit Ekzekutiv, Projektligji për rritjen e kuotës së Republikës së Kosovës në Fondit Monetar Ndërkombëtar.

Ndërkaq në shqyrtim të parë do të jetë Projektligji për punimet nga metalet e çmuara, kurse në në shqyrtim të dytë Projektligji për shfuqizimin e neneve 37, 38 dhe 39, të Kodit Penal të Republikës së Kosovës, si dhe Projektligji për mbrojtjen e konsumatorit
Në fund do të shqyrtohet Raporti i punës së Komisionit Qendror të Zgjedhjeve për vitin 2011.

---

Kuvendi i rrethuar nga policia, Krasniqi ndërpret mbledhjen

Prishtinë, 18 tetor - 10:40 - Mbledhja e sotshme e Kuvendit të Kosovës ka nisur në mënyrë të pazakonshme. Kryetari, Jakup Krasniqi, në vend me shpalimin e rendit të ditës, i  është drejtuar Qeverisë.

“Dua të rikujtoj se në këtë vend pushtetet janë të ndara. Këtu sundon demokracia. Unë si kryetar dhe deputetët e Kuvendit s’jemi këtu për t’i duartrokitur policisë. Çfarë  lypë  policia në Kuvend. Me çfarë të drejte Kabineti qeveritar, ministri i  Brendshëm, urdhëron që ata të futen brenda pa lejen e kryetarit, të rrethojnë Kuvendin.

Unë jam këtu kryetar dhe jam për të drejtuar e urdhëruar.

Kabineti qeveritar të mos i keqpërdor ata të rinj, policë, që janë për të mbrojtur rendin e demokracinë, dhe jo të keqpërdoren për interesat personale të ndokujt.

Kjo ndërtesë shpesh në të kaluarën është rrethuar nga policë dhe deputetët janë detyruar të marrin vendime të rëndësishme jashtë saj, për të mbrojtur lirinë e demokracinë. Njerëzit kanë vuajtur nga dhjetë e më shumë vite burgim për vlerat e lirisë e demokracisë. Kemi vuajtur, por kemi mbrojtur dinjitetin. Humbës kanë dalë ata që kanë ushtruar dhunën.

Bajram Rexhepi, si ministër, që do  të burgos kryetarin e Kuvendit, Presidentin a kush e din kë, nuk guxon të sillet kështu. Ai nuk e bën drejtësinë

Në këso rrethanash, me polici brenda e i rrethuar prej saj, Kuvendi s’mund të mbaj mbledhje. Do të mblidhemi pas një ore, pasi të largohet rrethimi policor”, tha kryeparlamentari Jakup Krasniqi.

1000  Karaktere

• 20:43Ancelotti braktis PSG për të kaluar në Real Madrid
• 20:40Dafina, duet me Seven Saraçin
• 20:29Kaçe lë Greqinë për Kombëtaren kuqezi
• 20:1723 qershori: Heroik apo erotik?
• 20:05Policia tuniziane përleshet me radikalë islamikë
• 20:03Izraeli “vepron për të penguar” Hezbollahun
• 19:59Westerwelle, zbatimi i marrëveshjes parakushti kryesor për Beogradin
• 19:34Serbja nga Bosnja dënohet për krime të luftës
• 19:31Arsenali në kualifikime të LK, Tottenhami në Ligën e Evropës
• 19:14Haradinaj optimist për zbatimin e marrëveshjes