Xhelili: Në SHIK kam punuar pa rrogë

Prishtinë, 17 tetor - Fatmir Xhelili ka dhënë dëshmi identike të mërkurën me ish-shefin e tij Kadri Veseli. Nuk ka zbuluar asnjë emër pos kreut të SHIK-ut, nuk ka treguar burimin financiar, ka thënë se në fillim SHIK-u kishte rreth 30 agjentë, ndërsa në fund rreth 90.

Kështu pati thënë edhe ish-shefi i SHIK-ut, Kadri Veseli, në procesin e njëjtë gjyqësor kundër Sadik Abazit, Shaban Sylës, Bekim Sylës, Driton Hajdarit dhe Shpresim Ukës, të akuzuar për vrasje dhe vrasje në tentativë.

Ish-drejtori i Drejtorisë kundër krimit të organizuar ka përfunduar dëshminë të mërkurën në procesin gjyqësor “Bllaca 2”. Ai ka pasur edhe të mërkurën statusin e “dëshmitarit të privilegjuar”, ani se prokurorja speciale Emma Rizzato ka provuar t’ia hiqte atë.

Prokurorja italiane ka kërkuar nga trupi gjykues që udhëhiqet nga gjyqtari Tore Thomassen që t’ia hiqte atij statusin e dëshmitarit të privilegjuar, në mënyrë që ta marrë në pyetje për funksionimin e SHIK-ut. Pavarësisht kësaj, trupi gjykues nuk e ka ndryshuar vendimin e së hënës.

“Dua të di nëse ky dëshmitar mund të merret në pyetje në mënyrë të plotë. Ajo që duhet gjykata të vendosë është se çka është sekret zyrtar”, ka thënë ajo. “Unë jam e mendimit se SHIK-u nuk mund të trajtohet si organizatë ushtarake. Ka qenë KFOR-i këtu dhe Kosova nuk ka pasur ushtri. SHIK-u nuk ekziston në legjislacionin e Kosovës si një trup i ligjshëm. Gjykata duhet të vendosë”, ka shtuar Rizzato. Ajo i ka thënë trupit gjykues se nuk duhet t’i lihet në dorë dëshmitarit që të vendosë çka të flas e çka jo.

Të hënën kur Xhelili është ftuar nga mbrojtja si dëshmitar i është dhënë statusi i të privilegjuarit me arsyetimin se “nuk mund të zbulojë fshehtësitë zyrtare të SHIK-ut”.

Pavarësisht se veprimtaria e Shërbimit Informativ të Kosovës nuk kishte bazë ligjore në Kosovë, gjykata ka vendosur që po me këtë status Xhelili të dëshmojë edhe të mërkurën. Gjykata i është referuar nenit 159, pikës 1 të Kodit të Procedurës Penale të Kosovës që ka të bëjë me dëshmitarët e privilegjuar.

“Personi i cili me deklarimin e vet do të shkelte detyrën e ruajtjes së fshehtësisë

zyrtare ose ushtarake, derisa organi kompetent nuk e liron nga ky detyrim”, thuhet në këtë nen.

Në fakt SHIK-u si organizatë inteligjente e formuar në mars të vitit 1999 në Rambouillet dhe e cila ka vepruar zyrtarisht deri më 15 qershor të vitit 2008, nuk kishte bazë ligjore. Të paligjshme e konsideronte Rezoluta 1244 e cila kishte shuar edhe veprimtarinë e Qeverisë së Përkohshme në kuadër të së cilës kishte vepruar edhe SHIK-u.

Mbrojtja e të akuzuarve nga ana tjetër e ka mbrojtur fort SHIK-un. Avokatët e kanë quajtur organizatë legjitime që ka vepruar në kuadër të Qeverisë së Kosovës deri më 15 qershor 2008.

Avokati i Sadik Abazit, Ilaz Kadolli, i cili në një rast pati thënë se ka punuar edhe vetë në SHIK e ka krahasuar këtë organizatë të afërt me pushtetin me Agjencinë Kosovare të Inteligjencës. 

“Nuk kam njohuri se SHIK-u ka qenë formacion ushtarak, por civil që ka vepruar në kuadër të Qeverisë nga Rambouillet deri më 2008. AKI-ja sot vepron njëjtë siç ka vepruar SHIK-u”, ka thënë ai.

Kolegu i tij Hilmi Zhitia ka thënë se neni 159 paragrafi 1 i Kodit të Procedurës Penale paraqet vetëm një alternativë - pozitën zyrtare.

“SHIK-u legalisht ka vepruar deri më 2008”, ka thënë ish-kryeprokurori i Kosovës nën mandatin e të cilit kishin nisur hetimet kundër Nazim Bllacës, i cili tashmë ka statusin e dëshmitarit bashkëpunues.

Pas dëgjimit të argumenteve të palëve, trupi gjykues ka vendosur që të mos e ndryshojë vendimin e së hënës. Ai këtë e ka arsyetuar duke thënë se SHIK-u ka bashkëpunuar me KFOR-in dhe për këtë arsye nuk duhet të zbulojë sekretet zyrtare.

“Ai (Fatmir Xhelili v.j.) ka informata sekrete. Neni 159.1 mbështet mendimin e Prokurorisë, ndërsa Gjykata mendon se duhet të ruhet sekreti. Ndoshta nuk janë prova relevante sa i përket çështjes. Dëshmitari mund të vendosë çka është sekret”, ka thënë ai.

E pas kësaj ka nisur të fliste Xhelili. Teksa është marrë në pyetje nga prokurorja Rizzato, ai ka refuzuar t’u përgjigjej shumë pyetjeve me arsyetimin se është sekret zyrtar.

“Edhe unë dua që çdo vrasje të zbardhet në Kosovë. EULEX-i është këtu për ta ndihmuar Kosovën. Shumë krime që kanë ndodhur janë munduar që t’ia veshin ish-organizatës sime”, ka thënë ai, posa është ulur para trupi gjykues.

Xhelili ka thënë se në vitin 1999-2000 kishin filluar të paraqiteshin krime të ndryshme në Kosovë të cilat nuk kishin ekzistuar më herët, sipas tij, si trafikimi, korrupsioni, krimi i organizuar, trafikimi i drogës etj. Për këtë arsye, sipas tij, ishte vendosur të krijohej departamenti kundër krimit të organizuar.

“Nuk kemi pasur legjislacion për të përdorur forcë, nuk kemi qenë të lejuar që të bëjmë hetime e të dërgojmë lëndë për individë në prokurori, por kemi mbledhur informacione që bashkë me sektorët e tjerë që na kanë cilësuar partner të punojmë bashkë”, ka thënë ai.

Ai ka thënë se i njeh personalisht të gjithë anëtarët e SHIK-ut. Kur është pyetur për emrat e tyre ka thënë se, pos njerëzve që ka zbuluar shefi i tij, Kadri Veseli, nuk mund të fliste më shumë.

“Ata janë nëpër punë të ndryshme apo të papunë dhe publikimi i emrave mund t’i rrezikojë”, është shprehur Xhelili. 

Ai ka thënë se në komunikimet zyrtare anëtarët e SHIK-ut kanë vepruar sipas kodeve të kombinuara shkronja me numra. Në takimet informate, sipas tij, kanë mundur të përdoren edhe nofkat e luftës kryesisht. Xhelili ka shtuar se pjesëtarët e SHIK-ut nuk kanë pasur  karta identifikuese për shërbimin.

Xhelili ka thënë se punëtorët janë paguar në baza të rregullta, por, sipas tij, ka pasur raste kur nuk janë paguar. Për vete ka thënë se kurrë nuk ka marrë pagë në SHIK me arsyetimin se kishte konsideruar si pjesë të kontributit për Kosovën.

“Unë kam qenë dhe jam një tip idealisti që s’kam marrë të holla”, ka thënë ai duke mos treguar burimin e financimit. “Ka pasur ndihma dhe donacione siç ka edhe tash për Kosovën. Kanë qenë financime legale”, ka thënë ai.

Seanca vazhdon edhe sot. 

Komente (13)Shpërndaje artikullin

• 22:33Barka “zbarkon” në mes të autostradës
• 22:28Giffoni premton rrugë për nxënësit e Mihirit
• 22:12Daçiqi konfirmon dakordimin, “më shumë punë e pret Prishtinën”
• 21:53Tre të arrestuar për falsifikim parash
• 21:46Promovohet libri “Utopia reale” e I. Berishës
• 21:43Reshje shiu, deri të dielën
• 21:32“Shqiponjës” i merren dy arinj të murrmë (Video)
• 21:29Në “Lutjet e mëngjesit”, përfaqësues të mbi 30 shteteve
• 21:07Sondazh, LDK-ja ulë ngecjen prapa PDK-së
• 20:58Magjistralja Prishtinë-Mitrovicë, me 20 milionë dollarë të BIZH-it