A janë të lënë pasdore shqiptarët në komunat me shumicë serbe?
Artikujt tjerė
- A janë të lënë pasdore shqiptarët në komunat me shumicë serbe?
- Pensionistët përgatiten të padisin Serbinë në Strasburg
- Opozita: Presidentja të distancohet nga deklarimet e këshilltarit të saj
- Buja në Forumin e Shkencës dhe Teknologjisë në Japoni
- Hoxhaj falënderon USAID-in për përkrahjen dhënë Kosovës
- Besimtarët për Haxh nisen më 9 e 10 tetor
- Selim Reka zëvendëson Lutfi Zharkun në krye të LDK-së
- Krasniqi ngushëllon për vdekjen e gazetarit Kemajl Çarkaxhiu
- Dëmtohen simbolet në Konsullatën e Kosovës në Frankfurt, reagon MPJ
- Kosova e para në Evropë për analfabetizëm
Prishtinë, 7 tetor - Banorët shqiptarë të cilët jetojnë në komunat serbe të decentralizuara, ankohen se janë të lënë pas dore. Ndërsa zyrtarët e komunave dhe të qeverisë thonë se arritjet me procesin e decentralizimit janë të mëdha. Sipas tyre, suksesi i decentralizimit është tregues i mirë për vazhdimin e formimit të komunës në veri të Mitrovicës, raporton KTV.
Fshati Kishnicë, sipas planit të Ahtisaarit për decentralizim, ishte bërë pjesë e komunës së Graçanicës. Banorët shqiptarë të këtij fshati nuk janë të kënaqur më shërbimet që ofron Komuna e re dhe mendojnë se janë të lënë pas dore.
Mirëpo, me këtë nuk pajtohet kryetari i Komunës së Graçanicës, Bojan Stojanoviq, i cili ka thënë se këtu nuk ka qytetarë të rendit të parë apo të dytë.
Sipas tij, nuk ka aspak paragjykime rreth përkatësisë së tyre etnike, mirëpo problemet e tyre janë vënë në buxhetin e vitit 2013 dhe si të tilla do të zbatohen.
Stojanoviq ka thënë se në fillim formimi i komunave te reja ishte me shumë polemika, por Komuna e Graqanicës pa dyshim paraqet një fakt të padiskutueshëm se një proces i tillë ishte i domosdoshëm.
“....vetë Ahtisaari, kur e kishte bërë pakon, ka thënë që kurrë s'do të besonte se Graçanica mund të arrijë një sukses të këtillë....janë edhe disa gjëra, por që i referohen Kosovës në tërësi, që është përmirësimi i shërbimeve publike, ujësjellësi, rryma dhe të tjera...”
Nga ana tjetër, ministri i Pushtetit Lokal, Sllobodan Petroviq ka thënë se arritjet në procesin e decentralizimit më së miri i konfirmon Komisioni Evropian përmes raporteve për Kosovën.
Ai në parim është i kënaqur me arritjet e komunave Gracanicë, Kllokot e Ranillug, të cilat janë me shumicë serbe, mirëpo ka edhe shumë punë për të bërë.
“...pa marrë parasysh situatën në Kosovë, këto komuna e kanë kryer mirë punën e tyre... pres që në të ardhmen të kemi më shumë rezultate dhe që suksesi i këtyre komunave është treguesi më i mirë për formimin e komunës së re në veri të Kosovës dhe në këtë mënyrë ta përmbyllim procesin e decentralizimit me formimin e komunës së re në veri të Mitrovicës...”
Sipas Ministrit, tash së fundi USAID-i ka ndarë rreth 25 milionë euro për komunat e Kosovës, çka do të ndikojë pozitivisht në motivimin e këtyre komunave për të përmbushur synimet e tyre.
Sipas planit të Ahtisaarit, decentralizimi në Kosovë ka paraparë formimin e komunave të reja ku banon popullata serbe, në kuadër të së cilës është edhe Komuna e Mitrovicës në veri, e cila ende nuk po gjen zbatim si pasojë e refuzimit nga banorët serbë në veri.
