Krasniqi e Grabovci ia tregojnë derën njëri tjetrit, shtyhet Kuvendi

Prishtinë, 4 tetor - (E plotësuar) - Mbledhja e Kuvendit, e nisur me konfrontime e polemika të ashpra midis kryeparlamentarit e kryetarit të Grupit të PDK-së, çoi në shtyrjen e saj. Pas pushimit 15 minutash, të kërkuar nga deputeti Adem Grabovci, Kuvendi s’kishte forum që të merrte çfarëdo vendimi, meqë deputetët e PDK-së nuk u kthyen në sallë.

Ndërsa kryeparlamentari Jakup Krasniqi konstatoi se në sallë ishin vetëm 54 deputetët, folësit e tjerë vunë re mungesën e deputetëve të PDK-së dhe të atyre partive në bashkëqeverisje me të, por edhe të AAK-së (pos treve).

Në fillim të vazhdimit të pritshëm të mbledhjes, kreu i Grupit Parlamentar të PDK-së, Adem Grabovci, pasi konstatoi se “ky Kuvend sa herë më parë ka shkelur rregulloren dhe madje edhe Kushtetutën”, që tingëllonte si thirrje që edhe këtë herë mund të shkelej, kërkoi që mbledhja të shtyhej për një datë kur mbushet afati ligjor për procedimin e Rezolutës së propozuar prej tij, që thërret për vazhdim të privatizimit, meqë “ne jemi për respektimin e ligjeve e të rregulloreve”.

Një kërkesë për shtyrje të mbledhjes së Kuvendit kishte bërë edhe Donika Kada – Bujupi, por për shkak të Samitit  Ndërkombëtar të Grave.
Ndërkohë Ismet Beqiri i LDK-së rikujtoi destruksionin e deputetëve të koalicionit qeverisës sa herë s’i shkojnë përshtat vendimet e mundshme.

Ndaj vlerësimeve të deputetit të AAK-së, Burim Ramadani, i cili gjithë problemin e reduktoi në “mosmarrëveshjet brendapartiake” të PDK-së, u përgjigj Jakup Krasniqi. Ai u deklarua i gatshëm të tërhiqej nëse kështu mendohej, porse “unë kam mbrojtur Rregulloren dhe interesin e gjerë”.
Vërejtje ndaj sjelljes së deputetëve të koalicionit qeverisës bëri edhe Sabri Hamiti i LDK-së, duke i dhënë mbështetje veprimit të Krasniqit.

Ky i fundit, në përputhje me kompetencat, duke konstatuar se mungonin kushtet për të vazhduar, njoftoi se të hënën Kryesia e Kuvendit do të vendosë për datën e vazhdimit të kësaj mbledhjeje.

Krasniqi e Grabovci ia tregojnë derën njëri tjetrit

Prishtinë, 4 tetor - 11:02 - ( E plotësuar) - Mbledhja e Kuvendit të Kosovës sot ka nisur me një debat të ashpër midis bashkëpartiakëve në qeveri: kryeparlamentari Jakup Krasniqi e Adem Grabovci. Kur duhej të përcaktohej rendi i ditës, kryetari i Grupit Parlamentar të PDK-së, Adem Grabovci, në mënyrë ultimative kërkoi që ose të votohej për mocionin e rezolutën, që kishin të bënin me debatin e djeshëm rreth privatizimit, ose mbledhja s’mund të vazhdonte.

Por, kryeparlamentari u përgjigj se do të procedonte në përputhje me Rregulloren e Kuvendit, e miratuar nga shumica e deputetëve, sipas të cilës një rezolutë për çështje të ngutshme mund të procedohej tetë ditë para se të debatohej për të në Kuvend. Kjo do të thoshte se rezoluta e PDK-së, me të cilën sfidohej kundërligjshëm mocioni i parashtruesit, Vetëvendosjes  dhe nënshkruesve të tjerë të partive opozitare, por edhe në qeverisje, nuk mund të vihej në votim.

Pas kësaj Adem Grabovci i PDK-së i tha atij se mund të dilte jashtë, ndërkaq Krasniqi ia ktheu se vetë ai mund të dilte dhe se nuk e kishte ndërmend të shkelte Rregulloren e miratuar nga kjo përbërje e legjislativit. Dhe pasi konsultoi, po në përputhje me Rregulloren, përfaqësuesit e grupeve parlamentare, me përjashtim të atij të PDK-së, u deklaruan për respektim të Rregullores, që do të thotë për votim të mocionit të parashtruesit dhe mosbotim rreth rezolutës së PDK-s.

Pas kësaj Grabovbci, në emër të GP të PDK-së kërkoi një pushim dhjetë minutash për konsultime, por kryeparlamentari lejoi pushim 15 minutash.
Deputetët momentalisht janë në pushim.

Sot në Kuvend privatizimi, pagat e funksionarëve, konfisikimet

Prishtinë, 4 tetor  - 10:12 - Në mbledhjen e sotme të Kuvendit të Republikës së Kosovës, përveç pikave të përhershme të mbledhjeve të rregullta të Kuvendit: koha për deklarime jashtë rendit të ditës dhe pyetje parlamentare për punën e Qeverisë së Kosovës, do të kenë në rend të ditës një mocion (të opozitës) dhe një rezolutë të PDK-së rreth privatizimit, për të cilin u debatua dje me tone mjaft të ashpra. Në rend të ditës deputetët do të kenë edhe Raportin vjetor të performancës me pasqyrat e audituara financiare të Zyrës së Auditorit të Përgjithshëm për vitin 2011, kurse në vazhdim do të procedojnë projektligjet.

Për herë të parë do të shqyrtohen: Projektligji për pagat e funksionarëve publikë, Projektligji për kompetencat e zgjeruara për konfiskimin e pasurisë së përfituar me vepër penale, Projektligji për provimin e jurisprudencës, si dhe Projektligji për skemat pensionale të financuara nga shteti. Për herë të dytë, ndërkaq, do të shqyrtohet Projektligji për komunikimet elektronike.

Në vazhdim të seancës do të shqyrtohen: Raporti i Auditimit të pasqyrave vjetore financiare të Universitetit të Prishtinës (për vitin e përfunduar më 31 dhjetor 2011), Propozim-vendimi i Qeverisë së Republikës së Kosovës për emërimin e anëtarëve në Bordin e Pavarur për Rishqyrtimin e Ankesave, si dhe Statuti i Universitetit të Prishtinës.

Në po këtë seancë do të ketë debat parlamentar lidhur me shpenzimin e fondeve publike nga ana e Qeverisë së Kosovës (sipas kërkesës së deputetes Alma Lama, mbështetur edhe nga shtatë deputetë të tjerë).

 

Komente (37)Shpërndaje artikullin

• 22:33Barka “zbarkon” në mes të autostradës
• 22:28Giffoni premton rrugë për nxënësit e Mihirit
• 22:12Daçiqi konfirmon dakordimin, “më shumë punë e pret Prishtinën”
• 21:53Tre të arrestuar për falsifikim parash
• 21:46Promovohet libri “Utopia reale” e I. Berishës
• 21:43Reshje shiu, deri të dielën
• 21:32“Shqiponjës” i merren dy arinj të murrmë (Video)
• 21:29Në “Lutjet e mëngjesit”, përfaqësues të mbi 30 shteteve
• 21:07Sondazh, LDK-ja ulë ngecjen prapa PDK-së
• 20:58Magjistralja Prishtinë-Mitrovicë, me 20 milionë dollarë të BIZH-it